《讀者投稿》
話說我小朋友幾個月大既時間要出席老公親戚的飯聚，一開始已經有一些顧慮，因為我係餵母乳媽媽，怕飯聚間時要餵母乳而令到各位焦點落係我身上，而酒樓附近又沒有育嬰室，所以出席前老公已經講左個問題比99聽，點知99就話如果係驚就去廁所餵母乳。(咁點解99你唔去廁所食飯既？？) 完全一啲常識都冇！
其實真係好唔想出席，但唔出席又比99單單打打話老公唔尊重，99係好要面子的女人！
最後我唔想老公難做，我有出席飯局，而bb又真係飯聚間要食奶，我唯有用餵奶巾餵，點知餵餵下唔知佢地係咪冇野講，99就無啦啦同啲親戚講話：「得罪講句丫，以前啲人餵奶粉架麻，係依家啲人先話餵母乳，話餵母乳有幾好點點點咁。。。」跟住大家就望下我又講下！(同枱親戚係有男有女的)
果一刻真係好難受，明明一開始同99講左個顧慮問題，但最終係99令到我餵奶變左焦點。
老公事後有話99點解食飯時要咁講呢啲說話，攪到個個望住我餵奶令到我好尷尬？ 99仲要理直氣壯同老公講話係我自己對號入座。(真係火都黎)
我唔餵母乳既時候99你唔講既，我一餵你就開聲講餵母乳呢個話題？？
你以前餵奶粉唔一定我都要餵奶粉！其實唔支持母乳真係唔緊要，我亦明白奶粉都係可以令小孩成長，只不過我選擇餵母乳，請你都尊重我，唔好女人難為女人！
＃我的極品四大長老
Search